Мэдээ мэдээлэл
ДАЯН-гийн хамт олон: Эрдэнэбилэгийн Үүрийнцолмон, Уурхайн нэвтрэлт хариуцсан менежер
8-р сарын 10, 2020 | ДАЯН-гийн хамт олон
Өмнөговь аймгийн Даланзадгад сумын уугуул иргэн Эрдэнэбилэг овогтой Үүрийнцолмон нь Даян Контракт Майнинг ХХК-ийн Уурхайн Нэвтрэлт Хариуцсан анхны Монгол менежер бөгөөд дэлхийн аль ч уурхайд хүлээн зөвшөөрөгдөж чадахуйц мэргэшсэн уурхайчин залуу.
Аав нь Өмнөговь аймгийн байгаль орчин хариуцсан байцаагчийн ажил хийдэг байхад аавыгаа дагаж хүүхэд насаа Ёлын Аманд өнгөрөөж, модоор сийлбэр хийж түүнийгээ жуулчдад борлуулан аав ээждээ нэмэр болдог байсан, багын л ажилсаг нэгэн. 2003 оноос ажлын гараагаа Оюу Толгой төсөл дээрээс эхэлж, гүний уурхайн бүтээн байгуулалтад анхнаас нь оролцон ажиллаж, хамт олноо манлайлж ирсэн тэрбээр “Манай уурхайчид дэлхийд ТОП” гэж шулуухан хэлж, тухайн үед шоолуулж байсан ч дараа нь түүнээс уучлалт гуйсан хүмүүс ч байв. Энэ бүхнээс харахад тэрээр тууштай, манлайлагч чадвартай уурхайчин залуу юм.
Гараа сайн бол бариа сайн:
Рэдпаф Монгол ХХК-ийн анхны 9 залуугийн нэг болж анх ажилд орж байсан. “Гүний уурхайг ирээдүйтэй, жинхэнэ эр хүний хийх сайхан ажил шүү” гэж Жамбаа найз минь надад хэлж, миний нүдний галыг асаасан юм. Тэрбээр гадаадын мэргэшсэн уурхайчдаас их зүйл сурсан гэж хэлдэг байв.
Ажиллах арга барил:
Миний ажиллах арга барил энгийн. Би тууштай байх, зорьсон бодсон зүйлдээ чин сэтгэлээ зориулахыг хичээдэг. Нээлттэй байх чанар нь хувь хүнийг хөгжүүлж, баг хамт олныг ч хөгжүүлдэг гол хүчин зүйл гэдэгт итгэдэг.
Хамгийн хүнд үе:
Уурхайн зогсолтын үеэр (2013-2016) би энд үлдсэн цөөхөн хүний нэг болж байлаа. Ажлын талбар минь нам гүм болсон үедээ үнэхээр хэцүү санагдаж байсан.
Хүсэл, тэмүүлэл:
Миний хүсэл бол Монгол уурхайчдыг дэлхийн уурхайд ажиллуулж, чадварыг нь батлан харуулах явдал юм. Монгол залуус чадварлаг гэдгийг дэлхий нийтэд харуулах цаг ойртож байна.
Үнэт зүйл:
Миний хамт олон, чадварлаг уурхайчид наддаа хамгийн үнэт зүйл минь. Хайртай хань минь миний хамгийн их түшиг тулгуур минь болдог.
Зөвлөгөө:
Хүн тууштай байх хэрэгтэй. Өөрийгөө сайжруулан, аюулгүй байдлын стандартыг мөрдөж, бусдыг хүндэлж байх нь чухал.