3-р сарын 20, 2020 | ДАЯН-гийн хамт олон

Дөрвөлжин овогтой Өлзийжаргал нь хүүхэд байхаасаа л аавынхаа Зил-130 машиныг чиргүүлтэй нь унах дуртай дэггүй шар охин байлаа. Тиймдээ ч Д.Өлзийжаргал том машин механизмтай ойр байх, түүнийг жолоодож эзэмших хүсэл мөрөөдөлтэй болсон байх.

Хэр баргийн эмэгтэй хүнд байдаггүй цуцашгүй эрч хүч мөн хөдөлмөрч зан чанар, хувь заяа нь хөтөлсөөр өнөөдөр Даян компанийн бахархал болсон бүсгүйчүүдийн төлөөлөл болж, Оюу Толгой төслийн гүний уурхайн бүтээн байгуулалтад гар бие оролцон, газрын доор 1300 метрийн гүнд, гүний уурхайн тусгай зориулалттай Хүнд машин механизмын оператор-уурхайчин мэргэжлээр ажиллаж байна. Хамгийн хурдан дадлагажиж, ажлын бүтээмжээ өсгөж чадсан манай компанийн анхны эмэгтэй уурхайчдын нэгд зүй ёсоор тооцогдох хүн бол Д.Өлзийжаргал бөгөөд 2019 оны 3-р улиралд хамгийн өндөр ажлын бүтээмж гарган “Мастер Оператор”–ын болзол хангаж шалгарсан байна.

Уг мастер операторын гол шалгуур нь ажлын бүтээмжийг нэмэгдүүлж, тоног төхөөрөмжийн гэмтэл гаргаагүй болон хөдөлмөрийн харилцааны зөрчилгүй ажилтанд олгодог шагнал юм. Одоо тэрээр гүний уурхайд 50 тонны даацтай өөрөө буулгагч машиныг жолоодон ажиллаж тэсэлгээний дараах үндсэн чулуулаг тээвэрлэх ажлыг гүйцэтгэж байна.Д.Өлзийжаргал хэлэхдээ “Оюу толгой төсөл дээр анх ажиллаж эхэлснээсээ хойш л улбар шар хувцастай, касктай хүмүүс сэтгэлд нэг л ойр санагддаг байлаа. Мэдээж хоббитой юм болохоор том машин тоног төхөөрөмж харахаар л өөрийн эрхгүй шүлс гоожиж хорхойсдог байсан. Үйлчлэгчийн ажил хийдэг байхдаа нэг өдөр гүний уурхайн хатаалгын өрөөнд ажиллахаар болсон юм. Анх тэнд ороод л нэг л тийм гоё дотно, хүмүүс нь ч гэсэн байгаа бүхэндээ сэтгэл ханамжтай, өөртөө итгэлтэй харагдсан. Шууд л, би эдний нэг болох юмсан гэж бодогдож эхэлсэн.

2013 оны 3 сарын 8-нд өдрийн хоолоо идэх гээд явж байхад Оюу Толгойн ажилтан Эмэгтэйчүүдийн баяр гээд надад нэг сарнай цэцэг, жижиг зурагтай бэлэглэсэн юм. Тэр зурган дээрх уурхайн дамп (Өөрөө буулгагч) машиныг хараад л би өөрөө өөртөө би энэ л машины оператор болно доо гэсэн зорилго тавьсан. Энэ зургийг одоо ч би тэмдэглэлийн дэвтэртээ хадгалж явдаг. Энэ зургийг харах тоолондоо урам авч хүсэл мөрөөдөл маань улам ундарсаар байсан. Машин техникд дуртай хүн чинь өөрийн эрхгүй л машин харахаар л сэтгэл тэмүүлээд байдаг юм байна лээ. Гүний уурхайд эмэгтэйчүүдийг ажилд авч эхлэхэд би ямар ч эргэлзээгүйгээр тэнд ажиллахаар шийдсэн. Даян компанид анх ажилд ороход надад төрсөн сэтгэгдэл минь ямар гоё байсан гээч. Намайг анх админ Буяка маань тосч аваад цүнхийг минь өргөөд өрөөнд минь оруулж өгч байлаа. Урд нь хэн ч намайг тэгж хүлээж авч байгаагүй. Анх ажлын талбар руу гарах гээд ирэхэд бүх л удирдлагууд минь босоод зогсчихсон хүлээж аваад хүний нөөцийн Отгонжаргал маань намайг яг л жаахан хүүхэд шиг хөтлөөд оруулж ирж байлаа. Хэчнээн гоё байсан гээч. Хүн надад тэгж их итгэл өгч байхад би алхам бүрдээ урам орж хичээж эхэлсэн. Уурхайн дарга Дан Скотт намайг таарах болгондоо “Чи гүүд” гэж магтаж улам миний урам зоригийг бадрааж байлаа. Анх гүний уурхайд ороход Мөнхбаатар ахлагчтай хамт олон минь намайг маш сайхан угтаж авсан. Сургагч багш маань цүнхтэй хоолыг минь хүртэл үүрээд намайг дагуулаад явж байсныг сайн санаж байна. Анхны машин минь бетон зуурмагийн холигч машин. Би 40 гарсан хүн гэхэд 20 гаруй настай залуучуудтай хамт нэг баг болон ажиллаж байгаадаа үнэхээр их бахархдаг. Тэд залуу мөртлөө маш их туршлагатай, мэдлэгтэй. Тэднээс сурах зүйл маш их байдаг. Бас хэчнээн урамтай сайхан гээч, тэд нартайгаа хамт ажиллах нь. Мэдээж анх ороход чадах чадахгүй зүйл байлгүй л яахав. Тэр болгонд манай ахлах “Өлзий эгчээ, та хийхгүй юм бол өөр хэн хийх юм бэ, Та чадна” гэж надад хэлдэг байсан нь маш их итгэл, урам зориг өгдөг байлаа. Хүн надад тэгж их итгэл өгөх тусам би ч гэсэн энэ хүмүүсийн итгэлийг алдчихгүй байх юмсан гэж улам л хичээдэг.

Хавхлага, таг нээх, араануудаа зайлж угаах, машинаа угааж цэвэрлэх гээд л бүх л зүйлийг надад эхнээс нь зааж сургасан даа.Би Даян компанид ажилласнаар амьдралд минь хангалттай их үр өгөөжөө өгч байгаа. Аюулгүй ажиллагааны хурал маань “Амарч чадаагүй хүн байна уу, Ядарч байгаа хүн байна уу” гэх асуултаар эхэлдэг. Хэнд, хаана, юу хэрэгтэй байна, БҮГДЭЭРЭЭ энэ асуудлыг ингэж шийдье гэж дандаа хэлдэг. Хэзээ ч би эсвэл чи хий, гэдэггүй. Энэ сайхан хамт олон маань надад өгсөн тэр их итгэл, хайр халамж, бас гайхамшигтай компанийн дотоод соёл маань миний амь амьдралд төдийгүй хувь хүний соёл хүмүүжилд үгээр хэлэхийн аргагүй эерэгээр нөлөөлсөн. Би өнөөдөр Даян компанид ажиллаж дэлхийн жишигт хүрсэн Оюу Толгой төсөлд гар бие оролцон ажиллаж байгаадаа маш их бахархаж байна. Та бүхнийхээ итгэлийг алдалгүй улам цааш хичээж ажиллах болно.”