Оюу Толгой төслийн Гүний уурхайн хүдэр буулгах Хоёр дахь тэсэлгээний хүндэт хонхыг Даян Контракт Майнинг ХХК-ийн Гүний Уурхайн Ахлах Мэргэжилтэн, Эрдэнэбаяр овогтой Дөл дуугаргалаа.

7-р сарын 4, 2022 | Мэдээ мэдээлэл

Оюу Толгой төслийн Гүний уурхайн хүдэр буулгах анхны тэсэлгээ 2022 оны 6 дугаар сарын 17-нд амжилттай хийгдэн “Оюу толгой” компанийн ТУЗ-ийн дарга, Элчин сайд Г.Батсүх тэсэлгээний хүндэт хонхыг анх удаа дуугаргасан.

Хоёр дахь тэсэлгээний хүндэт хонхыг 2022 оны 7-р сарын 1-ний өдөр Даян Контракт Майнинг ХХК-ийн Гүний Уурхайн Ахлах Мэргэжилтэн, Эрдэнэбаяр овогтой Дөл дуугаргалаа.

Э.Дөл нь 17 жил гүний уурхайд ажиллаж байгаа, олон зуун залуу уурхайчдыг сурган дадлагажуулж, манлайлж яваа манай туршлагатай удирдах ажилтны нэг юм. Түүний олон жилийн хөдөлмөр, туршлага нь гүний уурхайн хүдэр буулгах тэсэлгээний хүндэт хонхыг дуугаргах эрхтэй болсны нэг шалтгаан биз. Түүний талаар хамт олон нь дурдахдаа:

Рэдпаф Монгол ХХК, Дэд Захирал, Б.Баярцэнгэл:

Манай Э.Дөлөөр төлөөлөл болгон хүндэт хонхыг дуугаргаж байгаа нь Оюу Толгой ХХК уурхайчдыг маань, тэдний хийж бүтээснийг хүндэтгэж байгаа хүндлэл гэж ойлгож байна. Энэ хүндлэлийг дааж явах ухаан, туршлага манай уурхайчдад байдаг бөгөөд түүнийгээ үйлдлээрээ харуулж чаддаг гэдэгт би дандаа итгэдэг. ХАБ-ыг сахиж төлөвлөгөөт ажлуудаа чанарын өндөр үзүүлэлтээр гүйцэтгэх нь хүндлэл хүртэх шалтгаан юм.

Э.Дөлийг мэддэг болоод 17 жил болжээ. Э.Дөл бол гаднаа “дөлгөөн” төрхтэй ч дотроо дүрэлзэж байгаа гал шиг сэтгэлтэй, хүн бүрийг хүндэлж харьцаж байгаагаа харуулж чаддаг хүлээн зөвшөөрөгдсөн нэгэн. Түүний тухай олон зүйл хэлж чадах боловч товчхон хэлэхэд, хэзээ ч унтардаггүй, хэнд ч хүлээн зөвшөөрөгдсөн, хүндэлмээр залуу, түшигтэй хань, хүүхдүүдийнхээ хүчирхэг аав бөгөөд мянган уурхайчдын манлай болсон чадварлагч удирдагч хүн. Би Э.Дөлтэй ажиллаж, түүнээс суралцаж яваадаа бахархдаг.

Энэхүү хонх дуугарч байгаа нь олборлолтын түвшнээс үйлдвэрлэлээ эхлүүлж байгааг илтгэж байгаа бөгөөд хүдрийн буулгуурын тэсэлгээг хийх бүрт дуугаргах болно. Ажил үүргээ хичээнгүйлэн гүйцэтгэж, хамгийн үр дүнтэй ажилласан хүн хонхыг дуугаргаж байх ба энэ удаа Оюу Толгойн Гүний уурхайн төслийн удирдлагын хамт олноос тус хонхыг дуугаргах эрхтэй хүнээр Эрдэнэбаярын Дөлийг сонгосон юм. Тэрээр тус төсөл дээр 2006 оноос хойш ажиллаж үнэтэй хувь нэмрийг оруулсаар байгаа нэгэн билээ. Гүний уурхайн ахлах мэргэжилтэн Э.Дөл нь хүсэл тэмүүлэлтэй, урам зоригтой бөгөөд ажлаа аюулгүй, төлөвлөгөөний дагуу гүйцэтгэхийн тулд хичээнгүйлэн ажилладаг үлгэр жишээч манлайлагч. Тэрээр Даян болон Оюу Толгойн хамт олон, удирдлагуудын хүндлэлийг хэдийнээ олсон нэгэн.

Даян Контракт Майнинг ХХК, Ахлах уурхайчин Б.Амарсайхан: Дөл маань мундаг удирдагч мөн сайн найз. Олон залуусыг сургаж тэднийг үргэлж дэмждэг. Нутаг усныхаа (Өмнөговь аймаг) ахан дүүст тустай явдаг үнэхээр мундаг залуу. Бид чинь Даян компанидаа үргэлж талархаж цаашдаа ч олон жил хүчин зүтгэнээ гэж ярьцгаадаг юм.

Э.Дөл танд болон таны гэр бүлд эрүүл энх, сайхан бүхний дээдийг хүсэн ерөөе!

Уурхайчдын алдар бадартугай!