News
Даян Контракт Майнинг ХХК 2-р Босоо ам буюу Үйлдвэрлэлийн ерөнхий амны ажлуудыг амжилттай дуусгалаа
12-р сарын 13, 2019 | Мэдээ мэдээлэл
2019 оны 12 дугаар сарын 13-ны өдөр Даян Контракт Майнинг ХХК (Рэдпаф Монгол ХХК болон Хасу Мегаватт ХХК-ний нэгдэл болсон үндэсний аж ахуйн нэгж) нь дэлхийн стандартыг тодорхойлж байгаа Оюу толгой төслийн гүний уурхайн бүтээн байгуулалтын нэн чухал байгууламж болох 2-р Босоо ам буюу Үйлдвэрлэлийн ерөнхий амны ажлуудыг амжилттай дуусгаж байгаагаа тэмдэглэн өнгөрүүллээ. Дэлхийд хэмжээгээрээ тэргүүлэх, хамгийн сүүлийн үеийн гүний уурхайн босоо ам болох тус Үйлдвэрлэлийн амны барилга угсралтын ажил амжилттай дууссаныг тэмдэглэн зохион байгуулсан ёслолын ажиллагаанд уг бүтээн байгуулалтад гар бие оролцон гүйцэтгэсэн үндэсний компаниуд, уурхайчид болон албаны зочид төлөөлөгчид оролцлоо. “Оюу толгой” компанийн ТУЗ-ийн дарга, Онц бөгөөд Бүрэн эрхт Элчин сайд Галсангийн Батсүх уг ёслолын ажиллагааны нээлтэд хэлсэн үгэндээ, гүний уурхайн энэхүү Үйлдвэрлэлийн амыг амжилттай барьж дуусгахад манай улсын Засгийн газрын дэмжлэг туслалцаа өндөр бөгөөд чухал ач холбогдолтой байсныг онцлон тэмдэглэв. Мөн түүнчлэн “Энэхүү томоохон бүтээн байгуулалт нь манай улсын уул уурхайн салбар дахь технологийн хөгжил, дэвшилд ихээхэн хувь нэмэр оруулж байна” гэлээ.
1 / 9
2 / 9
3 / 9
4 / 9
5 / 9
6 / 9
7 / 9
8 / 9
9 / 9
Босоо амны нэвтрэлт, өргөх байгууламжийн суурилуулалт, механик угсралт, босоо амны тоноглол болон өргөх байгууламжийн ган татлагуудыг амжилттай татаж, тэнцвэржүүлж улмаар холбосон зэрэг ажлуудыг амжилттай гүйцэтгэснийг үнэлж Даян Контракт Майнинг ХХК-ийн Төслийн менежер Морган Аспин-ийг Монгол улсын Уул уурхай, Хүнд үйлдвэрийн яамны сайд өөрийн биеэр тус яамны Хүндэт Жуух бичгээр шагнасан юм.
Босоо ам №2 буюу уг үйлдвэрлэлийн босоо ам нь бүрэн ашиглалтад орсноор Оюу толгойн гүний уурхай руу орох ерөнхий орц болон гарц болж байгаа бөгөөд, нэг удаад 300 хүн зэрэг тээвэрлэх, мөн овор жин ихтэй материал, тоног төхөөрөмжийг гүний уурхайруу тээвэрлэн оруулах боломжтой болж байна.
Үйлдвэрлэлийн амны тухайд: Цамхгийн барилгын өндөр 96м, Амны дотоод голч нь 10 метр, Амны гүн 1284 метр. Бүтээн байгуулалтын явцад, босоо амны нэвтрэлтээс амыг бүрэн тоноглох хүртэл ойролцоогоор 3000 тонн төмөр хийц орсон бөгөөд энэ бүх ажлыг 3 жил 4 сарын хугацаанд хийж гүйцэтгэсэн. Үйлдвэрлэлийн амны бүтээгдэхүүн тээвэрлэх өргүүр нь дэлхийд хамгийн томд тооцогдох “Koепе” (үрэлтийн хүчний өргүүр) нь 32км урттай 270 тонны ган татлагат өргүүрийн бүтэц, систем юм. Нийт 24 татлагын угсралтыг хийх ажилд ойролцоогоор 300 уурхайчид 25 өдрийн турш тасралтгүй ажиллан оролцсон байна. Энэхүү амжилт нь маш олон хүний нөр их хөдөлмөр шингэсэн, одоогоор дэлхийд ганцхан байгаа - Техникийн ур чадвар шаардсан, Хамгийн аюулгүй, Хамгийн бүтээмжтэй ган татлага татах ажил болсон байна. Уг бүтээн байгуулалтад гар бие оролцсон бүх хүмүүстээ баяр хүргэе! Аюулгүй байдал үргэлж нэгдүгээрт!
❮ ❯